Strandbad Burgau nach Fertigstellung (Baujahr unbekannt)
Z' Burga war ma scho en der Zeit zwischa dene zwei Weltkrieg ganz modern.
Mir hand en Burga, ob ers glaubat oder et, scho a Badeanstalt ghett. Auf dem Bildle kennat d'r seh,wie komfortabel ond elegant die ausg'seh hat. Ma hat sogar en Verei dazu gründet, da Bade- und Verschönerungsverein Burgau. Des Täfele von dem Verei war no lang am alta Haus vom Bauer Stocker in d'r Mühlstrauß a'gschraubt. Ja früher hat et jed'r schwimma kenna. Bei de Baura haba dau koi Verständnis ghett, et bei de Buba ond bei de Mädla scho gar et.
Meine Großeltra hand et schwimma kenna. Dafür habr mei Großvadr aber en d'r Mendel bei der alta Badeanstalt s'schwimma beibraucht. Mir hand no so an alta Schwemmgürtel aus Kork von meiner Muadr ghett. Den han i übrigens heut no, der isch nei Deutsch "unkaputtbar", ond den han i umgriegt. Also, dau send so alte Betontreppe in'd Mendel nei ganga, nau hat mei Großvadr gsait, musch a weng vom Ufer weg bleiba ond nau die Schwemmbewegunga macha, die er mer vorher an "Land" zoigt hat.
Nau isch mei Großvadr mit ma Heisoil, des ma mir um da Leib bunda hat am Ufer neba her gloffa. Die Mendel hat dau auf d'r Hehe vom heutiga Freibad a ganz nette Stremung. Mit dem Heisoil um da Leib ond dem mords Drum Schwemmgürtel han i mi sicher g'fühlt. Bei dem alta Kenderufer, des warat vielleicht so 20 bis 30 Metr Mendel abwärts bin i wieder raus ganga. Mei Großvadr isch vielleicht so fenf mal mit dem Soil mitgloffa ond nau han i des mit dem Schwemmgürtel scho ganz passabel alloi na braucht.
Viele Burgamer, älter ond gleich alt wie i, hand an alle megliche ond omegliche Stella in d'r Mendel schwimma g'lernat. Am Wuhr beim Voggesser ond hindr em alta Sportheim, en d'r Brühl-Mendel, halt überall dau, wo d' Stremung et so arg war ond wo ma au a bisle stau hat kenna.
Die erscht Generation nach em Zweite Weltkrieg hat mit alte Autoreifa s' schwimma probiert. Aber von Schwemmpuffarla ond Kenderschwemmreifa war ma no weit entfernt.
Strandbad Burgau, einige Jahre später mit sog. "Kinderausbuchtung"
Reschte von dener alta Badea'stalt send no bis A'fang d'r Sechzger Jaur im letschda Jaurhundert g'standa.
Heit stat ziemle genau des schene, moderne Freibad von Burga auf dem Platz von dener alta Badeanstalt.
Ah, was i no sa will, wer au gera mal an schwäbischa Beitrag übr da Historischa Verei schreiba will, ka des gera macha. Aber wema mer des mitdoilt, dann wärs ganz g'schickt, wenn d'r Jenige au sein Nama schreibt oder sait ond et bloß an anonyma, wenig hilfreicha Kommentar a'gibt.
Quellen: Bilderarchiv Historischer Verein Burgau Stadt und Land e.V., Herr Friedrich Steinle, Burgau
Irmgard Gruber-Egle
Historischer Verein
Burgau Stadt und Land e. V.
Bilder und Text urheberrechtlich geschützt, kopieren und vervielfältigen nur mit Genehmigung der Urheberin