Weil ma bei mir dahoita bloß Mädla warat ond koi Bua dau war, han allaweil i da Lehrabua oder s' Lehramädla vom Großvadr macha müssa.
Des isch aganga bei de Heila schleifa. Die Häckla zum Rübverzieh ond Kartoffelhacka, die haba all Jaur wem ma se braucht hat, schleifa müssa.
En d'r hindra Kammer, des war der Raum zwischa Kuche ond Stall, dau stand au Großvadrs Werkbank. Die hat an Schraubstock ghett ond in den haba des Schleifstoile eigspannt. Dau haba no koi elektrisch's ghett, noi des haba adreiba müssa mit ra Kurbel.
Also, wenn d'r Großvadr ema bestimmta Tah g'schriea hat, nau han i scho gwißt, mei god, jetzt muss i wieder des blede Schleifgerät adrehe.
Also beim erschte Heile han i wieder die A'weisung gkriegt wie schnell oder wie langsam i dreiba muss. Los isch's gangag. Mir isch die Zeit ewig vorkomma. Dau hat'r des Heila so dreht ond so dreht ond mit em Dauma über die Kante g'fahra, ob se au scharf werad. Mit d'r Zeit isch mer des oifach s'blöd wora ond i han denkt wenn i schneller dreh, nau gat des au schneller.
Buh, dau bin i verschrocka wie d'r Großvadr an Fluch naus glau hat. Scha jessesmäßig bi i verschrocka ond han halt nau glei wieder langsamer dreit.
In meine Erinnerunga had des Stunda dauert, aber i glaub heit des war vielleicht a knappa Stond. Bei uns haba so 4 bis 5 Heila ghet zu dene Arbada.
Kartoffelsäck flicka. Nachdem mei Großmuadr eigentlich scho bald g'schtorba isch, hat die Arbat au mei Großvadr do. I han nau helfa müssa die alte Säck die ma nema braucht hat auseinander z'nemma ond als Fleck fer die bessre Säck z'samm zum schneida. Au dau war er furchtbar akkurat. Mir isch des au allz s'langsam ganga.
Interessant war, wenn er an große elektrische Motor ausanander g'nomma hat. Wie ma se damals für da Heiaufzug, für d' Kreissäg, d' Wehmühle, da Riebaschneider ond zur Mischtlach rauspumpa braucht hat.
Dau han i nau mit em großa Ringschlüssel fescht dagega heba müssa, damit se die Muadr et dreit. So a Ennaleba von so ma Motor war spannend. Aber als Mädla han i mi leid'r s'wenig dafür interressiert.
Nau han i oft ebbes heba müssa, des zum Beischpiel fer die groaß Kreissäg z'lang war. Et bloß heba, noi des haba waagrecht heba müssa ond ja et verrucka, soschta hat d'r Großvadr des schief a'gschnitta.
S' beschte war ägra. Meine Großeldra hand an alte Bulldog g'kauft, dau war i 5 Jaur alt. I han ja scho g'sait Buba haba koine ghett, aber mir Mädla hand oifach et die Kraft ghett für die Kupplung ond na komma semmer au et. Also hat d'r Großvadr an die Kupplung ond an Brems a Verlängerung na g'macht ond scho isch die Sach ganga.
Also isch ma ins Gschlad num g'fahra zum ägra. Mir hand koin Pflug ghett wie heut zu Tag, noi den Pflug haba hinda an den Bulldog a'ghänt ond d'r Großvadr isch hinter dem Pflug drei gl'loffa ond hat en g'führt. Aber i hätt halt grad aus fahra sotta ond koin Buckel en die Leus nei macha.
O lieber God, wied'r hat er an Fluch naus glau. Nau bi i halt wieder konzentriert grad aus g'fahra.
Ägre mal zwei Ta'werk. Nau kasch d'r vorstella wieviel Flüch des geh hat. Am beschta war allaweil, i hau vor dem Graba richtig Bolln g'hett, damit nämle d'r ganz Acker pflügt wora isch, habe ganz neh an den Graba na fahra müssa ond nau ganz fescht auf oi Seida ei'schla. Des war a Qual, sa i eu!
Es hat halt allaweil ebbes zum heba, lupfa oder helfa geh. Gera han i des et do, aber i hans do.
A'schtrengend war au da Großvadr am Sonntig ausrasiera. Wenn en g'schnitta hasch war des et so luschtig.
Aber mei Großvadr hat nie zug'schla oder oin g'schimpft, g'flucht hadr gottserbärmlich. I han en geliebt mein Großvadr ond i wer en au et vergessa.
Mein Großvater Josef Gruber (1900-1977)
Als Kend han i natürle et flucha derfa, aber als i dan so a Halbwüchsiga war, nau han i des gera do, weil des war für mi so erwachsa, so wie d'r Großvadr. Aber dau hat koiner me ebbes g'sait, nau war des ja langweilig ond i han des dann schnell me sei lau.
Heit dud mir des leid, dass i et gera g'holfa han, heit dät i des mit Wonne!
D'r Historische Verein Burga wünscht Eu alle schene Oschtra!
Irmgard Gruber-Egle
Historischer Verein
Burgau Stadt und Land e. V.
Bilder und Text urheberrechtlich geschützt, kopieren und vervielfältigen nur mit Genehmigung der Urheberin