Sie mergat des scho, i hans mit Oschdra. Scho vor vierzg Jaur han i denkt, i müsst wenn Oschdra kommt auswandra. Nau han i in de junge Jaur immer an o'bändige Reisedrang verspürt ond bin au öfters mit Mann ond Maus nach Italien, in'd Toskana g'fhra.
Heit muss i nema so furt, zum Trump scho gar et, zum Erdogan scho zweimal et ond nach Auschtralien zu de Aboritschines au et, weil die send au nema des was se scha mal warat.
Also bleib i dahoita, geniess' en Burga die erwachende Natur, des noie Gras, des s'ganz Jaur nema schener isch als em Friehling. Die wunderbare Geisblümla, einfach alz was wächst ond sprießt.
Wenn i so ans Frühjaur denk, dann fallat mir au dia Bieberla ei, die alle Kleintierhalter ond Baura früher auf Oschtra ghett hand. Entweder ma hat se sell ausbrüda lau oder von ebber z'Burga oder rund um Burga kauft. Mir hand se allaweil beim Schmucker kauft, z'schert en Underkneringa donda ond nau später doba em Bremadaul.
Des send Bieberla ...
Wenn nau die kloine Bieberla em Haus warat, haba dia no et naus lau kenna, weils meischtens om Oschtra rum no recht kalt war en d'r Nacht. Dia g'kaufta kloine Hehla hand ja koi Brudel ghett, dia se hätt ondr ihre Flügel nemma kenna.
... ond des isch a Brudel
Also was hand alle Leut do mit dene Bieberla, ma had se entweder en d'r Kuche odr en d'r guda Stuba ghett, nachts a'deggt ond no meischtens mit ra Infrarot Lamba über d'r Kischt odr Schachtl.
Bei mir dahoita send se neberm Kucheherd auf d'r Holzkischt gstanda ond nachts warat se a'deckt ond wenn d'r Kucheofa ausganga isch, had d'r Großvadr se au mit ra rota Wärmelamba warm g'halda.
Wenn mei Schwester ond i en dr Früh end Kuche na komma send, haba als erschtes glei nach dene Bieberla guggat. End Finger habers et so nemma derfa, weil die kloine Wesa ond Kenderhänd et allaweil z'samm passat.
Aber wenn nemad her guggat hat, haba scha schnell oins aus d'r Kischt g'holt ond a weng an oin nadruggt.
A mords G'frett war die Aufzucht von dene Bieberla. Bei mir dahoita habe a Nudel, also an ganz oifache Hefezopf bacha, ohne Zucker, der hat übrigens scheißlich gschmeckt, aber war ganz gud für dia kloine Hehla. Nau haba frische Brennesel g'ropfat, se ganz fei ond kloi g'hackat, ond des hand dann dia goldige Bieberla au zum fressa griegt. Ma hat en au hard g'kochte Oier, kloi g'hackat, g'fietrat. Em Wasser haba au et spara derfa.
Mit d'r Zeit isch aus dene Kischta mit dene Bieberla scho au a ganz netts G'schmäckle raus komma. Aber wichtig war, dass ma se dur braucht hat.
Wia dia greßer wora send, had mi als Ked immer dene ihra "Futtertrögla" so fasziniert.
Des war wie a aufgschnittana halba, kloine Regerinn ond drüber a Drautg'stell wo so em a Abstand von vielleicht drei Zentimeter des G'stell a'doildt war, damit dia dann scho greßere Hehla en Reih ond Glied hand fressa kenna.
Des isch a Futtertrog für Bieberla
Wenn nau s'Wed'r besser wora isch habe se am Tag wenn Sonn' g'schiena hat dussa a weng laufa lau, natürle unter Aufsicht. Aubads habe se wieder rei g'holt, aber wenn se greßer warat, nau send se endgültig en da Stall komma.
Mit kloine Geis ond Endla isch ma grad so verfahra.
Jetzt muss i Eu ab'r no a nette G'schicht zum Thema Bieberla verzehla.
So glei nach em Zweite Weltkrieg hat sich ja Europa ond au Deutschland richtig dura nand g'mischt. D' Leit send von Osten nach Westen ond von Norden nach Süden g'zoga ond hand a noia Heimad g'sucht. So au bei uns, ond en dene Derfer um Burga rum au.
Also isch a richtiger Preiß im sellige Friehling zu dem Bürgameischter von dem Ördle ganga, weil d'r Ma an noia Ausweis braucht hat.
D'r Bürgameischter hat seine Amtschgeschäfte en d'r guda Stuba erledigt, ond dau send au bei dem um Oschdra rum die Bieberla dena g'schtanda.
Plötzle hads zwischa dene Zwoi, dem Preiß ond dem Bürgameischter, en Diskursch geba ond es isch immer lauter wora.
Nau isch d'r Burgameischter plötzle aufg'standa, hat sich en Position braucht und hat zum Preiß g'sait, en seinem Amtszimmer schreit bloß er.
Nau isch d'r Preiß au aufg'schtanda ond had g'sait: "Sagen Sie gar Amtszimmer, das ist ein Hühnerstall!", ond isch ganga.
Heba jetzt wegam Preiß dia Bieberla nausstella solla, oder?
Irmgard Gruber-Egle
Historischer Verein
Burgau Stadt und Land e. V.
Bilder und Text urheberrechtlich geschützt, kopieren und vervielfältigen nur mit Genehmigung der Urheberin